O Compos comeza este sábado 22 de xullo o mellor do verán: a pretempada. O equipo de Yago Iglesias abrirá o curso 17/18 cun encontro ante o Negreira no 'I Torneo Vila de Padrón', na Escravitude. Un torneo organizado pola SD Esclavitud para conmemorar os seus 50 anos de vida e que, nun principio, sería ante o Clube Deportivo Boiro, equipo que non está a pasar polo seu mellor momento.
50 anos.
A Sociedad Deportiva Esclavitud naceu alá polo ano 1967. Un equipo con sede a menos de 20 km de Santiago, que a pasada tempada militou na Primeira galega, na que perdeu a categoría logo de quedar 17º na clasificación só por diante do Villestro.
Agora, cun campo feito en 2009, celebran medio século de vida cun partido entre dous dos equipos de máis nivel da zona de Santiago e arredores. Dous equipos da Terceira división e que remataron a pasada campaña sen complicacións.
A todo iso hai que engadir que para o Esclavitud podería ser un partido importante para coñecer os puntos febles do Negreira, rival que podería ter na Copa Deputación de superar na primeira rolda ao Unión.
Catro días e un partido.
O equipo de Yago Iglesias chegará ao partido logo de só catro días de adestramentos. A pretempada comezará o 18 e o 22 chegará o primeiro control importante par os nosos ante un equipo contra o que, de catro enfrontamentos, nunca se perdeu en partido oficial. Tres partidos e só un empate ante o conxunto negreirés, que comezará a adestrar un día despois dos nosos logo de reforzarse moi ben con xente nova.
Un de catro.
O encontro ante o Negreira será o primeiro de catro que xogarán os nosos en cousa de oito días. Logo do enfrontamento na Escravitude, a Esedé recibirá en San Lázaro ao Clube Deportivo Lugo e na seguinte fin de semana terá que verse as caras ante Dubra o sábado e Fabril o domingo, neste caso en Camporrapado.
Unha primeira cita importante para coñecer as novas caras do equipo branquiazul e, sobre todo, saber se as novas pezas do equipo, que buscarán facerse un oco, terán sitio na Esedé de cara á vindeira tempada ou deberán buscar un novo conxunto fóra de Santiago.
'I Torneo Vila de Padrón'.
Arrinque e primeiro torneo para os nosos. O partido será o sábado 22 ás 19:30 horas no Novo Campo do Doce na Escravitude e o prezo das entradas será de 5 euros por persoa.
Ningún comentario:
Publicar un comentario