Campións de inverno!

O Compos asinou tres novos puntos nun dos campos máis difíciles da categoría. Os tres últimos puntos deste 2017 que viaxan cara Santiago para confirmar ao cadro branquiazul como novo campión de inverno logo dunha gran primeira volta, histórica con récord de puntos nunha primeira volta na Terceira para o noso equipo. Para iso houbo que bater a un Choco que non puxo as cousas nada doadas e que obrigou a Lucas a traballar ao máximo, parando un penalti no primeiro tempo. 
O segundo tempo trouxo consigo os goles, obra de Tomás e Primo para a Esedé e de Pablo Couñago para o cadro local, que puxo contra as cordas aos nosos nos intres finais dun encontro con máis emoción que fútbol. 


Mal primeiro tempo. 
Durante os primeiros corenta e cinco minutos, aínda que si houbo ocasións nas dúas porterías, non se viu a intensidade que se esperaba entre o segundo mellor local da categoría e o que segue a ser o mellor visitante. Un equipo no que Róber e Alex Ares, que se levou gran parte das entradas por parte dos homes redondeláns buscando que o de Pontedeume non puidera mover ao equipo coas súas xogadas. 
As oportunidades de gol sobre a porta de Cortegoso, escasas, chegou máis ben no treito final antes do tempo de lecer. Pola súa parte, o Choco puido adiantarse antes da media hora de encontro cun penalti de Uña e que parou Lucas a Gabi Misa.

De menos a máis. 
O Compos mellorou durante os minutos finais do primeiro tempo e saiu mellor ao segundo. Mostra desa melloría é que non se precisaron máis de catro minutos para que Tomás, logo dunha carreira dende o centro do campo, superara a Cortegoso cun potente disparo. Gol importante para a escadra visitante con máis de corenta minutos por diante para aguantar o resultado e buscar un segundo gol. 
Non obstante, o Choco non se botou atrás na busca do gol do empate. Tiveron unha nova oportunidade para superar a un seguro Lucas pero ese paso adiante do equipo de Redondela só serviu para que o Compos atopara ocos e, logo dun centro de Rubén dende a banda, gol de Primo para encamiñar a vitoria e levar ao Compos ao campionato de inverno a quince minutos para o final. 

Emoción ata o final. 
Malia gañar con dous goles de diferenza, ben sabemos que ata o asubío final pode pasar calquera cousa. De feito, a un minuto para o final do tempo regulamentario chegou un gol local, obra de Pablo Couñago, co que poñer un pouco os nervios no campo de Santa Mariña. Non obstante, nin con seis minutos de engadido, foi quen de igualar o resultado o equipo local, que perdeu na casa case catro meses despois. 

Campións de inverno.
Con este triunfo, o Compos conseguiu un novo campionato de inverno, algo que non era quen de conseguir na Terceira división dende 2009 e asinando 42 puntos, algo histórico para o clube santiagués na cuarta categoría do fútbol español superando nun punto ao Bergantiños e cinco sobre o terceiro e cuarto clasificados nunha xornada na que gañaron os cinco primeiros abrindo unha diferenza maior sobre os perseguidores.

ALIÑACIÓN: Lucas; Saro, Casas, Uña, Naveira; Mon, Tomás; Róber, Alex Ares (Alberto, min. 85), Primo (Sobrido, min. 89); e Santi (Rubén, min. 69).
CARTÓNS: Amarelo para Uña, Mon, Lucas e Naveira.
GOLES: 0-1 49' Tomás, 0-2 74' Primo, 1-2 89' Pablo Couñago.
CAMPO: Santa Mariña.

Festa despois do temporal

O Compos terá este domingo a oportunidade de pechar este ano 2017 do mellor xeito posible. Un equipo regular, con moito gol e forte a domicilio terá en Santa Mariña a ocasión de rematar a primeira volta como campión de inverno, algo que non consegue o equipo da capital dende hai moitos anos, aínda na Preferente Norte. Diante, para impedilo, estará un Choco que buscará os tres puntos que o manteñan vivo na loita por entrar nos postos de promoción de ascenso. 


Mirando ao alto.
O Choco non perde aínda a esperanza de rematar este 2017 entre os catro primeiros clasificados. O equipo redondelán, no que a pasada tempada militaba o branquiazul Róber, quere acadar por terceira vez na súa historia os postos de promoción de ascenso á Segunda B. Mais, para iso, buscará finalizar de boa maneira a primeira volta do campionato regular recibindo na súa casa ao líder da categoría e mellor equipo visitante do grupo. 
O cadro de Santa Mariña é arestora 8º clasificado con 31 puntos, a só 3 do terceiro e o cuarto clasificados. Un equipo con pouco gol, sendo o menos acertado de cara á porta dos dez primeiros da táboa, e o terceiro que máis anota nesa primeira metade do campionato, só superado por Somozas e un Compos que encaixou dous goles nos catro últimos encontros. 
En canto aos seus encontros en Redondela, trátase dun dos mellores equipos coma local facendo 22 puntos, dato que só supera o Bergantiños cun partido máis. 16 goles a favor e só 6 en contra avalan a un equipo que perdeu ante Somozas na primeira xornada na casa do curso e que empatou no mes de setembro contra o Alondras pasando máis de dous meses sen perder puntos na casa e recibindo só dous goles dende o mes de outubro, encaixados ámbolos dous contra o Boiro e mantendo a boa xeira cun gol no engadido.
A nivel individual cabe lembrar que un dos seguros en defensa deste conxunto é o ex do Compos Javi. O central vigués, que chegou ao equipo adestrado por Iñaki Alonso dende o Alondras para non contar case con oportunidades, está a xogar unha boa parte dos minutos no seu novo equipo, ao que chegou procedente do Coruxo o pasado mes de xaneiro. A el hai que engadirlle ao gardamallas Cortegoso, un dos mellores da categoría, e os goles de Antón Escobar e Óscar Castellano, autores de 5 e 4 goles respectivamente. 

Moitos anos despois. 
Dende xaneiro de 2012, case seis anos atrás, o Compos non é quen de rematar unha primeira volta no máis alto da clasificación. Naquela ocasión, logo de empatar ante o Boiro, a Esedé pechou unha primeira volta do campionato case perfecta, perdendo só unha cita contra o Dumbría e empatando en catro encontros ante equipos coma Laracha ou Boiro, rivais tamén na presente tempada. Iso foi nunha Preferente da que os nosos non tiveron problemas para saír meses despois sumando un total de 87 puntos. 
Para vivir algo semellante na Terceira hai que remontarse ata xaneiro de 2009, cando o equipo dirixido por Baleato arrincou un novo ano co campionato de inverno logo dun primeiro treito do campionato case perfecto. Sen derrotas que laiar e superando na clasificación a equipos coma Alondras, Céltiga, Vilalonga, Somozas ou Arousa, cos que tamén comparte categoría a presente campaña, ou ben os que actualmente militan na Segunda B Cerceda, Coruxo e Rápido de Bouzas, aos que engadir ao xa desaparecido CD Ourense, que non sería capaz de superar ao Caravaca na derradeira rolda polo ascenso quedando a un gol da división de bronce. 

A historia, moi igualada.
Dende que en 1963, na segunda tempada da historia do noso clube, se enfrontaran por primeira vez Choco e Compostela na Terceira división, os camiños dos dous equipos cruzáronse en tres cursos máis. Un total de oito enfrontamentos entre Santiago e Redondela que deixan moi ben aos nosos, que nunca perderon, pero que, de falar dos xogos na vila pontevedresa as cousas cambian un pouco. 
En 1963, na primeira tempada do Compos na Terceira división da súa historia, a historia destes enfrontamentos arrincou do mellor xeito posible para os nosos intereses. De feito, a Esedé sumaría tres puntos grazas a unha goleada por 1 gol a 7. A primeira... e a única a domicilio. Despois, tres empates noutros tantos encontros, sempre con goles, entre os que chama a atención o 3-3 en 1966. 
A última visita do Compos a Santa Mariña, a tempada pasada e 50 anos despois da anterior, rematou tamén con empate grazas aos goles de Róber e Tomás, dous homes agora mesmo nas filas branquiazuis. Dita igualdade confirmouse tamén na segunda volta, hai uns meses, cun novo empate en San Lázaro no que Santi e Diego Rey fixeron os goles dos nosos e no que Róber volveu dar un punto aos seus con dous goles anotando o último a menos de quince minutos para o final. 

Camiños diferentes, obxectivos semellantes. 
O Compos está a facer unha tempada case sobresaínte. Moita efectividade de cara a porta, máis de dous goles de media por partido, deixando poucos puntos polo camiño, ben en labores defensivas, con minutos para todos e insuperable a domicilio. Agora mesmo, agás a regularidade en canto a xogo, poucos peros se lle poden poñer a un equipo que non só suma tres vitorias consecutivas senón que, ademais, non perde dende o mes de outubro, cando non puido marcar nin puntuar na casa contra o Barco. 
Pola súa parte, do gran momento polo que está a pasar a Esedé aos problemas que semella ter o Choco para ser regular. Conseguiron a súa primeira vitoria na xornada 4 e a segunda un mes despois. Un moi mal arrinque de curso dos redondeláns, que contaron con baixas importantes durante o verán entre as que se atopan Róber e Diego Silva, que a piques estivo de asinar pola Esedé pero que finalmente defende as cores do Coruxo na Segunda B dende agosto. Nas últimas datas, non conseguiron pasar do empate sen goles nos Carrís despois dunha vitoria moi importante contra o Boiro na que foi a sexta vitoria consecutiva dos redondeláns en Santa Mariña. 

Dúas grandes xeiras en xogo. 
O Choco é un dos mellores equipos cando xoga como local. A unha xornada para rematar a primeira volta, o equipo de Marcos Montes pode ser o mellor ante a súa afección de facerse cos tres puntos. Para iso asinaron un total de seis vitorias consecutivas en Santa Mariña, un empate e outra vitoria que fan esquecer un pouco a derrota asinada ante o Somozas. 
Uns datos semellantes son cos que conta o Compos a día de hoxe a domicilio. Cinco vitorias e dous empates separan o día de hoxe da última derrota branquiazul fóra da casa, colleitada ante o Racing Vilalbés no pasado mes de setembro por 4-1. Un dato que mellora isto é que, ademais, o Compos sempre marca cando sae da casa anotando un total de 19 goles e encaixando 11, sete deles nas dúas primeiras saídas. 

Todos dispoñibles. 
Para este partido, despois dunha fin de semana por parón pola Copa de Rexións da UEFA, na que o combinado galego conseguiu o pase á seguinte rolda con Alex Ares xogando de titular os dous partidos, Yago Iglesias poderá contar con todos os seus xogadores. Sen mancados nin sancionados, si hai que ter en conta que se chega con catro apercibidos. Álvaro Casas, Tomás, Mon e Uña non poderían estar ante o Silva no primeiro encontro do 2018 e que será un dos encontros salientables da primeira fin de semana do novo ano. 

O 17 ás 17.
O partido será este domingo, 17 de decembro, ás 17 horas en Santa Mariña, Redondela. As entradas para este derradeiro partido do 2017 terán un prezo habitual de 10 euros para os que non sexan aboados do Choco e, de novo, non será televisado. 
Para quen non poida asistir, poderá seguir o encontro en directo a través das diferentes redes sociais da Curva Branquiazul, Facebook e Twitter, así como no perfil oficial do clube en Twitter. 

San Lázaro é sinónimo de gol

O Compos segue unha semana máis no primeiro posto da clasificación despois dunha nova goleada na casa. Ante un Arenteiro que deu menos problemas do esperado, o cadro santiagués superou ao frío cunha goleada importante, segunda consecutiva en San Lázaro e que deixa aos nosos dependendo de si mesmos para ser campións de inverno. 
Alex Ares e Róber de penalti e Primo e Ube asinaron os catro goles branquiazuis nunha tarde de pouco fútbol, con moita efectividade de cara a porta e, sobre todo, moitísimo frío. Nova goleada dos nosos, que suman nove goles nas dúas últimas citas como local deste 2017, e oportunidade de poñer terra de por medio co terceiro máis que aproveitada, deixando a Barco e Silva a cinco puntos. 


Sen perigo. 
Durante o primeiro tempo, o Compos fíxose coa pelota e pechou ao rival no seu campo. Un Arenteiro que amosou fortaleza defensiva co ex branquiazul Portela no centro da zaga e que buscou, sen acerto, producir perigo sobre a porta de Lucas á contra. Mais, a Esedé tampouco foi quen de provocar ocasións de gol con só un disparo de Alex Ares en máis de media hora de xogo. 
Ares, autor do primeiro disparo do encontro, foi tamén vítima dunha falta dentro da área. Penalti sen discusión a prol do Compos e o propio ex mediapunta do Cerceda foi quen de enganar ao gardamallas carballiñés. Primeiro gol, co que se chegaba ao tempo de lecer, que poñía algo de xustiza a un encontro totalmente controlado polo cadro compostelán. 

Efectividade total.
Se hai algo claro é que o Compos non pode pasar un segundo tempo tranquilo cun so gol de diferenza. Con isto na mente, o cadro de Yago Iglesias saiu ao segundo tempo con algo máis de intensidade de cara á porta rival facéndose coa primeira oportunidade de gol aos dez minutos logo da reanudación. 
Róber e Alex Ares, dous xogadores que remataron con gol esta cita, foron os autores dos primeiros avisos nun segundo tempo no que Primo mandou ao fondo das redes un bo centro do mediapunta de Pontedeume poñendo algo de tranquilidade ao xogo con máis de media hora por diante por xogarse.

Moi de cara. 
Co segundo gol, o partido púxose aínda mellor para a escadra local. O Arenteiro metido no seu campo, posesión total da pelota e ocasións suficientes para aumentar unha diferenza que medrou, de novo, dende os once metros. Un penalti claro sobre Primo e penalti que transforma un Róber moi perigoso en traballos ofensivos. 
Tres de diferenza, co Arenteiro fóra do partido e coa vitoria asegurada con máis de vinte minutos por diante. Yago comezou a cambiar cromos e buscar unha seguridade defensiva maior. Non obstante, cinco minutos da entrada de Ube ao terreo de xogo chegou o cuarto e definitivo. O propio ex do Celta aproveitou unha asistencia de Tomás para asinar o cuarto formando unha gran conexión viguesa. 
O encontro puido rematar ademais cun novo golazo de Mon que se topou co longueiro nunha falta directa que a piques estivo de entrar.

Falta Redondela. 
O oitavo clasificado, o Choco, buscará evitar que o Compos sexa campión de inverno dentro de quince días. Antes, dende o venres, Copa de Rexións da UEFA onde o combinado galego buscará quedar primeiro nun grupo que forma con Asturias e Cantabria e que xogarán en Xixón.

ALIÑACIÓN: Lucas; Sergio, Uña, Casas, Naveira; Mon, Tomás; Alex Ares (Sobrido, min. 81), Róber (Diego Rey, min. 70), Primo; e Santi (Ube, min. 75). 
CARTÓNS: Amarelo para Uña.
GOLES: 1-0 36' Alex Ares, 2-0 57' Primo, 3-0 66' Róber, 4-0 80' Ube.
CAMPO: San Lázaro.  

A despedida

San Lázaro pecha as súas portas este domingo no penúltimo encontro da primeira volta. Cita importante para os nosos que recibirán ao Arenteiro coa intención de deixar boas sensacións nesta despedida do 2017, a falta do encontro contra o Choco de dentro de quince días coa Copa de Rexións da UEFA polo medio, e un bo resultado que o manteña como líder da categoría unha xornada máis. Pola contra, o cadro do Carballiño buscará rematar coa xeira negativa de resultados que o acompaña neste mes de novembro.


De máis a menos.
O mellor recén ascendido, o Arenteiro, quere volver ao bo camiño logo de tres xornadas sen coñecer a vitoria. O equipo do Carballiño quere aproveitar unha saída importante na que sumar a súa oitava vitoria do campionato ou, como mínimo, evitar a sétima derrota do curso. Ademais, terán na súa man a cuarta vitoria fóra da casa.
Cun total de 25 puntos ata o de agora, grazas a 7 vitorias e 4 empates en 17 encontros, o Arenteiro chega a esta xornada despois de superar ao Bergantiños en Espiñedo e de perder por goleada na Grela. Ademais, empataron ante Ourense, Barco, Arousa e Racing Vilalbés, equipos que poderían estar metidos na súa mesma loita a estas alturas de tempada.
A domicilio, os resultados non son tan favorables. Sumaron de tres no Salvador Otero, San Pedro e Laracha, sempre pola mínima, e conseguiron un empate, a un gol, no Couto nun partido marcado polas expulsións, tres en total. En canto a derrotas, caeron ante Somozas, Alondras, Silva e Boiro sendo todas por goleadas agás a sufrida en Barraña hai quince días.
A nivel individual salienta o bo momento de Rubén Arce. O dianteiro nado en Barbadás e ex do CD Ourense, suma ata o de agora 8 goles e ven de marcar nas catro últimas xornadas. Por detrás na mesma clasificación, Igor anotou un total de 6 tantos.

Moitos goles.
Polo de agora, ningún partido dos equipos que se medirán este domingo rematou sen goles. Ademais, en San Lázaro o Compos sabe ben o que é marcar deixando a porta contraria a cero só en dúas ocasións, que remataron con derrota ante Boiro e Barco. A iso hai que engadir que os nosos anotaron na casa un total de 19 goles en 8 encontros, máis de dous de media por xogo, aos que sumar os 11 encaixados facendo un total de 30.
Pola súa parte, o Arenteiro é un equipo ao que lle custa marcar fóra da casa. 9 goles en 8 partidos para un equipo que só quedou sen marcar nunha ocasión, na derrota ante o Somozas da primeira xornada. Por contra, recibiron 18, dos cales cinco foron ante o Somozas e catro contra Alondras e Silva.

Case 28 anos.
Dende xaneiro de 1990, o Arenteiro non visita Santiago, naquela ocasión Santa Isabel, para medirse ao Compos. Un total de cinco enfrontamentos entre ámbolos dous conxuntos na capital galega entre os que sacar resultados positivos. De feito, catro desas citas remataron con vitoria branquiazul mentres que o Arenteiro foi quen de facerse cun punto na súa visita alá polo ano 1987. A iso hai que engadir que os mesmos resultados chegaron tamén nos encontros de Espiñedo deixando mellores precedentes na historia.

Dúas e dúas.
O Compos chega a este partido en moi boa forma despois de superar a Vilalonga e Negreira encadeando dúas vitorias consecutivas despois do empate no Couto. Dous triunfos aos que sumar, ademais, dúas vitorias máis e tres empates para chegar xa a sete xornadas consecutivas sen coñecer a derrota.
O Arenteiro tamén ven de sumar dúas pero neste caso derrotas. Perderon contra un Barbadás que busca respirar e ante un Boiro que conseguiu así facerse co cuarto posto, que perdeu días despois. Ademais, non gañan dende a primeira fin de semana de novembro, cando conseguiron volver á casa cos tres puntos do Municipal de Laracha.

Todos dispoñibles.
En principio, e se nada sae mal ata o domingo, Yago poderá contar de novo con todo o equipo. Cardeñosa e Alberto volven logo das súas respectivas lesións, e de xogar contra o combinado galego sub-18, e Alex Ares pode volver ser convocado despois de perderse a visita a San Pedro por acumulación de amoestacións.
Non obstante, cabe lembrar que hai ata tres xogadores apercibidos de sanción de cara ao partido contra o Choco. Tomás, Mon e Álvaro Casas non poderían estar na derradeira xornada deste 2017, e da primeira volta, en Santa Mariña de ver un novo cartón amarelo.

Tarde de domingo.
Agora que xa vai frío, moito, na capital galega, toca darlle unha boa despedida a San Lázaro o domingo ás 17 horas. O partido, que non será televisado, terá entradas a un prezo de 10 euros para maiores de 18 anos, 5 euros para rapaces entre 17 e 13 anos e de balde para menores de 12. Ademais, coma sempre, aboados gratis. Cabe dicir tamén que xa está en marcha a campaña de aboados da segunda volta e que quen se faga o seu carnet antes do domingo poderá gozar tamén desta xornada ademais da segunda volta ao completo.
Por contra, quen non poida asistir ao encontro poderá seguilo a través das diferentes redes sociais da Curva Branquiazul, Facebook e Twitter, ou no perfil oficial do clube en Twitter, onde se poderá comentar co cancelo #ComposArenteiro. Ademais poderá escoitarse en directo por 'Esedé Radio' na web oficial do clube.

A Nosa Loita (xornada 18)

Gran xornada a vivida a pasada fin de semana para os intereses branquiazuis. O Compos é o novo líder en solitario da categoría logo de sumar tres puntos máis e aproveitando os empates de Bergantiños e Silva. Ademais, son xa cinco os puntos de diferenza que hai co cuarto clasificado, o Barco. Un posto que tamén cambiou de dono nunha fin de semana onde só a Esedé e o equipo ourensán sumaron de tres entre os seis primeiros clasificados.

Novo líder.
O sábado pola tarde, na Grela, arrincaba a xornada 16 do campionato. O Silva recibía na casa ao Racing Vilalbés nun gran encontro entre equipos da zona alta da táboa. Non obstante, o xogo non estivo á altura das expectativas e rematou sen goles. Un resultado que, por outro lado, puxo aos coruñeses segundos por un día e aos lugueses cuartos durante o mesmo tempo.
A tarde do domingo arrincou de xeito negativo. O Vilalonga recibiu aos nosos cun gol moi cedo nun mal partido por parte dos dous conxuntos. Non obstante, logo de errar un penalti, o Compos igualou o resultado cun gol de Mon a piques de chegar ao tempo de lecer. Logo do paso por vestiarios, Primo arranxou o seu erro dende os once metros e asinou unha remontada moi importante. Os nosos eran líderes a falta de rematar o encontro do Bergantiños.
O conxunto de Carballo recibía nas Eiroas a partir das 17 horas ao Arousa. Partido importante entre dous conxuntos favoritos a rematar entre os catro primeiros e que non defraudou. O equipo vilagarcián foi quen de dar a sorpresa nun dos campos máis difíciles da categoría cun gol de Marcos mentres que o Bergantiños tivo que agardar ata o segundo tempo para asinar a igualada, cun gol de Iago López dende o punto de penalti a dez minutos para o final e case sen tempo para manter o primeiro posto unha semana máis.

E novo cuarto.
O primeiro posto non foi o único que cambiou de mans. O Boiro partía o sábado no cuarto posto e non tardou en perder, aínda que de xeito momentáneo, a súa posición privilexiada. Co empate entre Silva e Racing Vilalbés, o equipo lugués foi o primeiro en ascender na clasificación ata o único posto arestora asequible para o resto de equipos que loitan por entrar na promoción.
O domingo pola mañá, O Couto abriu as súas portas para acoller un partido emocionante contra o Somozas e cumpriu coas expectativas entre dous conxuntos que non queren perder o camiño da promoción. O Somozas adiantouse moi cedo e o Ourense, en dous minutos, foi quen de dar a volta ao marcador. Un resultado co que se xogou durante case unha hora e que igualou o Somozas a cinco minutos para o final. Non obstante, o mellor estaba aínda por chegar e é que o conxunto da Ferrolterra anotou o 2-3 definitivo xa no engadido e sen tempo para unha posible reacción ourensá.
Outro que non quere perder as pisadas do cuarto clasificado é o Alondras. O equipo de Cangas recibía na casa a un Céltiga noutra loita moi diferente. O primeiro tempo, igualado, non deixou ningún gol mais o segundo foi moi diferente. Aitor Díaz, Tuno e José anotaron os tres goles do equipo local co que poñerse a dous puntos do cuarto.
E a gran sorpresa chegou en Santa Mariña. Choco e Boiro medían as súas forzas coa única intención de achegarse á Segunda B un pasiño máis. E, ademais, o equipo de Barraña tiña na súa man a posibilidade de achegarse tamén aos tres primeiros, aínda que para iso debía gañar primeiro. Mais o partido púxose de cara para os locais no arrinque do segundo tempo con dous goles en quince minutos. O Boiro foi quen de igualar o resultado a cinco minutos para o final e cando semellaba que habería un reparto de puntos, o Choco fixo o terceiro e definitivo.

Todo para o domingo.
A tarde do domingo contará con grandes partidos e moito en xogo. Tres equipos loitarán por facerse co primeiro posto mentres que ata seis conxuntos buscarán a outra praza, cada vez máis lonxe dos tres da cabeza.
San Lázaro pechará as súas portas ata o 2018 logo de recibir ao Arenteiro. Os homes de Yago Iglesias teñen na súa man a oportunidade de manter o primeiro posto unha semana máis ante un rival que non quere perder a súa categoría de 'equipo revelación'. Tres xornadas sen coñecer a vitoria levan a día de hoxe ao conxunto do Carballiño ata a undécima posición, a seis puntos do Barco.
Tamén como local, nas Eiroas, o Bergantiños buscará aproveitar o que non sexa unha vitoria dos nosos e para iso terán que superar a un Laracha que sairá a polos tres puntos que o alonxen dos postos de descenso. Uns saltarán a un punto do líder mentres que o outro só supera en dous puntos aos postos de descenso.
O partido máis salientable da xornada podería ser ben o que se xogará en Barraña. Un Boiro que quere recuperar o cuarto posto recibirá na súa casa a un Silva en horas baixas e que terá a difícil misión de poñer terra de por medio entre os tres primeiros e o resto. Un dos grandes enfrontamentos deste final de ano e ao que os coruñeses chegarán despois de xogar Copa Federación catro días antes.
Outro que buscará defender o seu posto privilexiado é o Barco. O equipo valdeorrés recibirá en Calabagueiros a un Ourense que, logo de tres xornadas sen gañar, perdeu a posibilidade de facerse co cuarto posto na vindeira fin de semana. Os locais buscarán tres puntos de ouro para manterse no alto mentres que os ourensáns están a día de hoxe a sete puntos dese posto, na zona tranquila da clasificación.
A promoción de ascenso e a tranquilidade estarán en xogo na Magdalena no encontro que abrirá a xornada o domingo. O Racing Vilalbés, metido nunha boa xeira de resultados, ascendeu ao quinto posto a pasada fin de semana e buscará aproveitar un posible erro do Barco. Para iso deberán superar a un Ribadumia seguro na zona media da táboa, con oito puntos máis ca o Barbadás. 
O Barbadás é o seguinte protagonista da xornada. O equipo ourensán, que reforzou a súa dianteira esta mesma semana, buscará saír dos postos de descenso a costa dun Choco que rematará a primeira volta recibindo ao Compos. Nos Carrís, o equipo de Redondela buscará tres puntos cos que, polo menos, manterse a un punto do cuarto, tendo en conta que Barco, Racing Vilalbés e Boiro non perdoen nos seus xogos. 
Na Lomba, en Vilagarcía, o Arousa recibirá ao oitavo clasificado, o Alondras, nun partido entre dous conxuntos que non queren perder a camiño á promoción. Os arousáns, actualmente a cinco puntos do Barco, buscarán facer bo o empate contra o Bergantiños mentres que os do Morrazo queren esquecer a derrota de hai dúas semanas contra o Barco. 
E, para rematar, o Somozas recibirá no Alcalde Manuel Candocia a un Negreira que estreará adestrador, moi coñecido pola familia branquiazul. O conxunto da Ferrolterra noveno tamén a dous puntos do cuarto, terá que enfrontarse ao novo equipo de Nacho e Cabrejo, que debutará no banco como segundo, que pode ter unha pequena oportunidade de saír do descenso esta mesma fin de semana, gañando e que perdan Barbadás e Vilalonga. 

Tres puntos de ouro

Logo do empate do Silva do sábado, o Compos non perdoou a vida ao Vilalonga nun mal partido por parte dos dous conxuntos que contou cun pouco de todo. Remontada, un penalti errado e lea nas bancadas onde o bo fútbol non fixo acto de presenza. Por sorte, os tres puntos veñen cara Santiago e súmase así a sétima xornada sen coñecer a derrota. 


Mellor o Vilalonga no arrinque. 
En San Pedro, os primeiros intres de xogo non puideron chegar peor para os intereses branquiazuis. De feito, o cadro local adiantouse aos sete minutos de xogo cunha xogada a balón parado que transformou Javier sobre a porta de Lucas. 
O gol local serviu de pouco nun campo onde non se puido gozar dun bo encontro, mais si houbo emoción ata o final do mesmo cos nosos creando máis perigo ca un rival da zona baixa que non foi quen de aguantar co paso dos minutos. 

Cinco minutos moi importantes.
Os minutos finais do primeiro tempo deixaron non só emoción senón, tamén, un gol e un erro importante. De feito, Primo meteuse na área local e sufriu unha entrada. Penalti e ocasión para igualar o resultado. Pero a sorte non semellaba estar do lado do dianteiro cántabro que non foi quen de transformar a pena máxima. O gardamallas local mandou o balón a córner e na seguinte xogada foi Mon o encargado de non perdoar diante de Marcos Bermúdez empatando o resultado. 
Iso non foi todo. Se o final do primeiro tempo foi moi positivo, o comezo do segundo non foi peor para os nosos intereses. Primo, que errou o penalti antes do tempo de lecer, asinou o segundo tanto da tarde para conseguir unha remontada importantísima, de líder. 

Sen máis. 
O segundo tempo non contou con moita máis emoción. O Compos foi quen de aguantar a vitoria ata o final e quedar con tres puntos moi importantes nun campo onde aínda non se perdeu nunca. Ademais, aproveitando o erro do Bergantiños, o equipo é novo líder da Terceira galega a dúas xornadas para o final da primeira volta. 

Agora, o equipo xa ten que pensar no partido contra o Arenteiro o vindeiro domingo en San Lázaro, no que será o derradeiro xogo dos nosos na casa antes do Nadal e do parón pola Copa de Rexións da UEFA, onde semella que estarán Róber e Alex Ares, convocados por terceira vez por 'Pichi' Lucas para o terceiro encontro de preparación, o mércores ante o Cerceda no Roxo. 

ALIÑACIÓN: Lucas; Sergio, Casas, Uña, Naveira; Mon, Tomás; Róber, Tomás (Saro, min. 87), Rubén (Sobrido, min. 63); e Santi (Ube, min. 81). 
CARTÓNS: Amarelos para Rubén, Mon e Primo. 
GOLES: 1-0 7' Javier, 1-1 44' Mon, 1-2 50' Primo. 
CAMPO: San Pedro.

Na espera dun erro

Chega a penúltima saída deste ano 2017 e o Compos terá que enfrontarse ao Vilalonga en San Pedro na que podería ser a sexta vitoria a domicilio desta primeira metade de curso. A iso hai que engadir que a Esedé abrirá unha tarde de domingo na que podería haber ata tres líderes diferentes co Silva xogando o sábado e o Bergantiños pechando a xornada corenta e cinco minutos despois do remate da cita dos nosos.
O equipo de Sanxenxo recibirá ao segundo clasificado coa única intención de alonxarse dos postos de descenso cunha vitoria dez xornadas despois. Fóra de perigo pero moi preto del, os celestes están metidos na peor xeira posible sendo o equipo que menos puntos conseguiu nas cinco últimas xornadas, con catro derrotas consecutivas.


Unha de oito. 
Se hai un dato, moi negativo, que acompaña ao Vilalonga esta tempada é que se trata do peor equipo como local de todo o grupo. Os sanxenxinos superaron ao Céltiga na segunda xornada do campionato... e aí rematou o seu capítulo de vitorias na casa. En canto a empates, contra Alondras a un gol e ante o Silva sen goles dando unha das sorpresas ata o de agora contra un conxunto que estaba intratable sobre o terreo de xogo. 
Cun total de 14 puntos, só 5 deles na casa, recibiron en San Pedro a equipos coma Silva, Boiro ou Bergantiños conseguindo ante eles 1 de 9 puntos posibles. A iso hai que engadir que ante a súa afección anotaron un total de 6 goles e encaixando 13, seis nos dous últimos xogos contra Laracha e Boiro. Ademais, suman un total de catro encontros a domicilio sen anotar. Ademais, só un gol ao seu favor nas últimas oito citas. 
A nivel individual, Aarón é o xogador máis en forma do cadro da Comarca do Salnés. O dianteiro celeste suma xa 7 dos 12 goles do seu cadro, máis da metade do total. 

O mellor e o peor. 
Este domingo en San Pedro enfrontaranse o mellor equipo visitante e o peor equipo local. Un partido que pode axudar aos nosos a seguir metido de cheo na loita polo primeiro posto e a alonxarse dos perseguidores e aos locais a fuxir das proximidades do descenso á Preferente.
O Compos sumou ata o de agora un total de cinco vitorias a domicilio, dous empates e unha derrota. Ademais, é un equipo que anotou polo menos un gol en tódalas súas saídas facendo un total de 17 goles en oito saídas, algo más de dous de media por xogo. En contra, outros dez goles recibindo un total de sete nos enfrontamentos ante Ribadumia e Racing Vilalbés nas dúas primeiras excursións.
Por contra, o Vilalonga non está a dar boas novas á súa afección conseguindo mellores resultados cando non xoga en San Pedro. Un triunfo e dous empates acompañan ás cinco derrotas consumadas ata o de agora. A iso hai que engadir que non puntúan de tres na casa dende a segunda xornada do campionato, en agosto contra o Céltiga.

Moito en xogo.
O cadro branquiazul buscará seguir polo bo camiño despois de superar a un Negreira moi feble en defensa e tentará acadar a súa sétima xornada consecutiva sen coñecer a derrota igualando os oito encontros sen perder no treito final do pasado curso. 
Pola súa parte, o Vilalonga chega de perder contra o Barbadás nun partido importante na zona baixa da clasificación, nun enfrontamento directo pola salvación da categoría. Ademais, tentarán conseguir un bo resultado ante os seus seareiros ao igual que fixeron contra o Silva. 

Dúas vitorias e ningunha derrota.
Os enfrontamentos entre Vilalonga e Compos en San Pedro remataron sempre con bos resultados para os nosos. Dúas vitorias, en 1990 e 2009, e tres empates con goles avalan a un Compos que sempre marca polo menos un gol no campo sanxenxino. 
A pasada tempada, hai xusto un ano, comezou coa vitoria local grazas a un gol de Iker ao arrinque do xogo. Un partido que a Esedé rematou con dez pola expulsión de Cardeñosa e a mellor estrea de Recoba na súa volta á casa. O xogador uruguaio saltou a media hora para o final do encontro e no engadido bateu a Iván Parada cun gran tanto. 

Dúas baixas moi importantes. 
Para este partido, Yago perderá por acumulación de amoestacións a Alex Ares. O de Pontedeume acompañará na bancada a un Cardeñosa que tampouco poderá estar por lesión perdéndose a segunda xornada consecutiva. Por contra, podería recuperar a Alberto para esta cita. Ademais, Álvaro Casas e Tomás saltarán ao terreo de xogo apercibidos de sanción de ver un novo cartón amarelo. 

Domingo pola tarde. 
Despois de recibir na casa ao Negreira un sábado, volvemos aos domingos. Máis exactamente, San Pedro abrirá as súas portas ás 16:15h xa co resultado do Silva-Racing Vilalbés coñecido. Un partido para o que as entradas estarán ao prezo habitual de 10 euros. 
Para quen non poida achegarse ao pobo do Concello de Sanxenxo, poderá seguir o encontro nas diferentes redes sociais da Curva Branquiazul, Facebook e Twitter, así como no perfil oficial do clube en Twitter.