Sigamos a escribir a historia

Despois da derrota chega a posibilidade da calma. O equipo de Yago Iglesias, que pechou unha xeira histórica de dez vitorias consecutivas ante o Bergantiños, terá na Lomba de Ponteareas unha oportunidade de volver ao bo camiño. Diante, un Cultural Areas que pelexa por saír da zona baixa da clasificación ocupando un posto que, a día de hoxe, implicaría ao equipo ponteareán nunha carambola a tres bandas na que estaría metido tamén o Compos, pero iso xa é cousa a parte e na que pensar dentro de tres meses.
O partido en terras pontevedresas, marcado para a tarde dun domingo que se pechará con esta cita, será o primeiro entre ámbolos dous conxuntos lonxe de Santiago, con só o precedente da primeira volta no que os visitantes puxeron as cousas moi complicadas.


A defensa, o punto débil.
O Cultural Areas arrincou a tempada con moi bos resultados sendo, xunto co Noia e superado só polo Boiro, o segundo equipo que máis goles puido facer en San Lázaro no que vai de tempada, aínda que sen sacar nada positivo da súa visita histórica á capital galega. Un equipo que militou case toda a súa historia en Rexional e que busca a permanencia na súa sexta tempada na Terceira división, mais agora dependendo do que fagan Racing de Ferrol e Cerceda, ámbolos dous en descenso, para non ter que depender dos equipos que pelexen por ascender á división de bronce.
Ata o de agora, en 26 xornadas, o equipo branquiazul asinou un total de 5 vitorias, 7 empates e 14 derrotas. 30 goles a favor que o sitúan como equipo con máis acerto da parte baixa e 53 en contra que, por outro lado, deixan ao cadro ponteareán como o peor defensivamente.
Na Lomba, o Areas só foi quen de superar a Barbadás e Vilalonga sendo, ademais, os dous únicos equipos que non puideron ver portería. Choco, Ribadumia, Céltiga e Laracha asinaron o empate a un gol mentres que o Ourense non puido facer con máis dun punto malia anotar dous goles. Outro dato importante é que, agás ante o Ribadumia, sempre se adiantaron os locais para recibir logo o gol do empate co 80 por cento deses tantos encaixados na segunda metade. Racing Vilalbés, Somozas, Alondras, Silva e Boiro saíron cos tres puntos deixando a súa porta a cero todos agás os cangueses, que encaixaron o gol cando o resultado xa era de 0-4. En total, 12 goles ao seu favor e 19 en contra.
A nivel individual, nun equipo con boa representación de futbolistas portugueses, salienta entre o resto Yelco con 9 goles sendo o autor do tanto do empate ante o Barbadás a pasada fin de semana. A parte, un dato non tan positivo, sitúa aos de Carlos Machado como un dos equipos con máis xogadores expulsados da categoría con ata sete futbolistas con algún cartón vermello.

Primeira visita á Lomba.
Por primeira vez, o Compos visitará este domingo A Lomba de Ponteareas. Un campo de herba, con aforo para algo menos de mil seareiros, e no que os nosos buscarán volver ao camiño do triunfo despois do esvarón da pasada fin de semana. Un campo do que xa saíron 20 puntos dos 36 en xogo e no que só quedaron 11. No que sempre houbo goles e algunha que outra goleada asinada polos equipos da zona alta da clasificación.
O terceiro equipo con menos goles cando traballa ante a súa afección recibirá a outro que, a diferenza das pasadas campañas, está a asinar uns números a domicilio case insuperables. Con só unha derrota lonxe de San Lázaro, a colleitada ante o Racing Vilalbés na primeira volta, e empates no Morrazo e no Couto, os de Yago Iglesias non perden fóra de Santiago dende setembro e suman de tres de forma ininterrompida dende novembro gañando nas súas últimas cinco saídas. Ademais, a Esedé suma un total de 28 goles ao seu favor e recibiu 14 mantendo a porta a cero en catro ocasións.
Na primeira volta, o Areas puxo as cousas moi difíciles en San Lázaro a un Compos que se puxo 3-0 antes de cumprirse os vinte minutos de xogo con goles de Róber, Santi e Hugo André en propia porta. Non obstante, o cadro visitante puxo contra as cordas aos nosos cun tanto de Nuno aínda no primeiro tempo e outro de Roberto Pastoriza xa no segundo. A dous minutos para o final, Sobrido pechou o partido co 4-2 definitivo rematando a un rival que puido marchar da capital galega con algo moito máis positivo.

Totalmente ao contrario.
Malia seguir fóra dos postos de descenso directo, si que descendería este verán de non haber ata dous ascensos á Segunda B de seguir todo así, o Cultural Areas está a asinar uns números moi mellorables nas últimas xornadas. De feito, dende a entrada do novo ano, o equipo ponteareán só foi quen de asinar 5 puntos de 21 posibles logo de rematar o 2017 con dous triunfos consecutivos. E é que os de Carlos Machado só puideron gañar ao Ribadumia hai xa algo máis dun mes e empatar contra Laracha e Barbadás.
Contra o cadro ourensán chegan de xogar a pasada xornada. Un partido que se definiu no treito final logo dun gol de Jordi García, chegado a Barbadás o pasado mes de decembro para buscar a permanencia, aos tres minutos poñendo por diante aos locais. Mais, xa no engadido, Yelco rematou coa ledicia ourensá grazas ao gol do empate.
Diferente sorte foi para un Compos que mereceu polo menos un punto. O equipo de Yago Iglesias amosou a súa mellor imaxe ante o Bergantiños pero sen premio. Cun gol de Iago López no segundo tempo, o cadro carballés pechou a histórica xeira de resultados dun equipo que segue no máis alto superando ao seu principal perseguidor por tres puntos coa diferenza particular de goles entre un e outro igualada. Non obstante, o Compos puido conseguir o empate no engadido cun tanto anulado polo colexiado logo de sinalar unha falta inexistente sobre Cristopher nun salto con Sobrido.

Todos dispoñibles pensando no Somozas.
Con aínda algo de marxe de erro, menor logo da derrota da pasada fin de semana, Yago Iglesias terá para a visita á Lomba a todo o equipo dispoñible. Sen sancionados nin mancados unha semana máis, o adestrador debe ter coidado cos cartóns. Róber, un fixo no once titular, e Samu, titular na metade nos encontros ata o de agora, chegan apercibidos de sanción con catro amoestacións cada un.

Pechando a xornada.
Para esta fin de semana, tódolos partidos se xogarán o domingo ás 17 horas agás o Cultural Areas-Compos, que arrincará media hora máis tarde na Lomba de Ponteareas. As entradas terán un prezo de 10 euros para o público xeral.
Por contra, que non poida asistir ao encontro poderá seguilo a través das diferentes redes sociais da Curva Branquiazul, Facebook e Twitter, así como no perfil oficial do clube en Twitter.

A Nosa Loita (Xornada 27)

Ata aquí. Acabou unha xeira histórica dun Compos que segue a liderar a táboa clasificatoria superando por tres puntos ao seu principal perseguidor e verdugo na pasada xornada despois de case unha volta enteira sen perder. O Bergantiños, que gañou en San Lázaro catro meses despois de que o fixera o Barco, mantén vivas as súas opcións de ser campión de grupo. O equipo de Valdeorras segue polo bo camiño e asegura o terceiro posto mínimo por dúas semanas máis. O Alondras, que se meteu na loita pola promoción hai escasas xornadas, xa é cuarto. O Somozas non quere perder de vista os postos privilexiados que lle permitan volver ao fútbol nacional. O Racing Vilalbés non é quen de volver ao bo camiño e suma a súa segunda semana sen gañar. O Arousa únese a unha loita cada fin de semana máis intensa e interesante. O Silva, para pechar esta lista cada vez máis longa, mantén as súas opcións cada vez máis despois de só unha vitoria en cinco partidos.

Máis en menos.
Hai só unhas horas, a diferenza entre o líder, que segue a ser o Compos, e o quinto clasificado era de dezaséis puntos. A día de hoxe, esa é a distancia entre os nosos e o oitavo nunha liga cada vez máis igualada e con máis rivais que buscan facerse un oco entre os catro primeiros con tres equipos que semellan ter pé e medio nunha promoción que se presume moi cara. Unha promoción polo que agora hai un pretendente máis grazas aos seus partidos na casa.
Arrincamos co mellor partido da xornada. Enfrontamento igualado, con dous estilos moi diferenciados e cun resultado moi axustado. O Compos, dono da pelota, non foi quen de superar a unha defensa forte e sen ocos. O Bergantiños, que case non puido saír do seu campo durante o primeiro tempo, aproveitou a súa oportunidade máis clara para levarse un triunfo merecido cun final polémico que puido rematar en empate.
Barco e Racing Vilalbés, que chegaba a esta xornada como cuarto clasificado, pecharon os enfrontamentos entre os catro primeiros esta pasada fin de semana na Magdalena. Partido tamén moi igualado en terras luguesas e que deixou como gañador a un Barco que se permite ter un colchón de puntos importante sobre o cuarto e quinto clasificados. Ivi Vales, autor do tanto dun triunfo moi importante.
Agora mesmo, ese cuarto posto que deixou o Vilalbés coa súa derrota é para un Alondras que encadea tres vitorias consecutivas e sete xornadas sen perder. O equipo do Morrazo conquistou tamén A Grela contra un Silva que vai de máis a menos caendo ao oitavo posto. Dous goles de Jonas fan que outro equipo asalte esa posición aínda sen un dono claro, con cinco equipos en tres puntos.
Os mesmos puntos, 47, son os que suma a día de hoxe un Somozas que quere cumprir cos pronósticos do principio de tempada que o situaban na promoción ao final da tempada. O conxunto somocense visitou Barraña no partido entre dous equipos que o pasado curso militaban na mesma categoría á que soñan volver o antes posible. Non obstante, o bo momento polo que pasa o cadro da Ferrolterra quedou claro coa remontada ao gol de Cano. Jacobo e Óscar deron a volta ao marcador na primeira metade mentres que Gerardo e Monroy pecharon unha goleada moi importante que non lle permite polo de agora ocupar un deses postos importantes.
E rematamos co derbi do Salnés. Na Senra, o Ribadumia foi a nova vítima dun Arousa fóra das quinielas hai escasas xornadas. Agora, o equipo de Vilagarcía está sétimo a só dous puntos do cuarto posto grazas, en gran parte, a non sumar ningunha derrota na Lomba. Os arlequinados encadearon a súa duodécima xornada sen perder a costa dun rival que segue na parte tranquila da clasificación. O gol, obra de Manu Justo no primeiro tempo.

Ascenso e descenso.
Cada día queda menos para que chegue o 13 de maio, día marcado en vermello na Terceira galega no que se dará por finalizada a tempada. Doce xornadas por diante nas que se xogarán moitas cousas, con moitas emocións sobre o terreo de xogo. Un final de campaña que arrinca con enfrontamentos entre as dúas partes.
O líder terá que visitar Ponteareas. Cultural Areas e Compos loitarán por razóns moi diferentes. E é que o cadro pontevedrés ocupa o primeiro posto de permanencia, a un punto do descenso e, a día de hoxe, precisando dun ascenso de categoría para non volver á Preferente. A Esedé, pola súa parte, buscará volver ao camiño dos tres puntos mantendo a súa diferenza con respecto ao segundo clasificado. O partido está marcado para o domingo ás 17:30 horas.
O Bergantiños buscará o cuarto triunfo consecutivo na súa casa. Nas Eiroas, o Vilalonga pelexará por deixar o último posto da clasificación e conseguir o camiño á vitoria, algo que descoñece dende o pasado mes de outubro en Negreira. Diante estará un equipo que, logo de superar ao Compos en San Lázaro, quere manterse con opcións de asaltar o primeiro caixón da táboa. Domingo ás 17 horas en Carballo.
Con cada semana máis seguridade e un posto case asinado, o Barco recibirá en Calabagueiros a un Boiro que só puido facerse con tres dos quince últimos puntos en xogo. Os ourensáns, que superan en seis puntos ao quinto e teñen o primeiro posto a sete, seguirán sendo terceiros pase o que pase. Diante terán a un rival que marca os postos de tranquilidade, dos equipos que arestora non poden loitar por nada.
O último en entrar nos postos de promoción de ascenso, o Alondras, tamén terá que defender a súa posición ante os seus. O Municipal do Morrazo abrirá as súas portas para recibir a un Ribadumia que só gañou un dos últimos seis partidos. Os cangueses pola súa parte, buscarán o cuarto triunfo consecutivo e a oitava xornada sen perder.
Despois do Bergantiños, o seguinte en visitar San Lázaro será o Somozas. O equipo da Ferrolterra terá que recibir antes no Candocia a un Barbadás que está a só un punto da permanencia. Os locais, igualados a puntos co Alondras, queren manter as súas opcións pola promoción de ascenso ante a súa afección. Domingo ás 17 horas nas Somozas.
Na Illa de Arousa poden quedar parte das opcións do Racing Vilalbés. O cadro lugués, o peor dos dez primeiros cando se trata de xogar lonxe da casa, terá que buscar os tres puntos no único campo no que ata o de agora non houbo reparto de puntos, con sete triunfos visitantes. O Céltiga, pola súa parte, conta cunha diferenza importante sobre o descenso pero coa permanencia aínda lonxe.
En Vilagarcía, na Lomba, situación semellante á do partido antes nomeado. O Arousa está a dous puntos do cuarto clasificado e pode buscar a súa quinta vitoria en seis partidos nun campo onde, de momento, ninguén foi quen de facerse cos tres puntos. O Laracha, que buscará dar a sorpresa para afastarse do descenso, quere ser o sétimo que sae da Lomba con puntos. Suman ata o de agora catro xornadas sen perder.
E pechamos este capítulo en San Lázaro, aínda que neste caso no de Noia. O cadro noiés, en serio perigo malia sumar 7 dos últimos 9 puntos en xogo, recibirá na súa casa a un Silva con só un triunfo nos cinco últimos partidos. Un xogo onde o que perda pode quedar moi tocado con tres puntos moi importantes para ámbolos dous conxuntos.

Aumenta a emoción

Caer estaba permitido. A loita polo primeiro posto da promoción aumenta a súa emoción coa derrota do Compos contra un Bergantiños que soubo xogar as súas cartas á perfección. O equipo de Yago Iglesias non deixou de insistir sobre a portería de Cristopher ata o minuto noventa ante un conxunto que, á contra, foi demoledor en cada unha das súas chegadas. Un total de catro goles, dos que só un subeu ao marcador, deixan unha clara mostra do que ocorreu sobre o verde de San Lázaro.
Nun partido con numerosas oportunidades nas dúas porterías, entre as que salientan as levadas a cabo polo Bergantiños, Iago López foi o único que atinou a marcar un gol legal, aos que sumar dous máis anulados por fóra de xogo e outro por falta ao porteiro. Moita tensión, intensidade e emoción no que foi, sen dúbida, o mellor partido da categoría e que nos deixa con tres puntos máis ca os carballeses coa diferenza de goles entre un e outro equipo igualada logo da vitoria branquiazul co mesmo resultado na primeira volta nas Eiroas. 


Donos da pelota. 
Non hai discusión posible. O Compos foi dono da pelota dende o arrinque do partido. Os locais buscaron impartir a súa lei facéndose coa posesión da pelota. Non obstante, ante un equipo que saiu a defender e producir chegadas a base de rápidos contraataques. Con todo isto, as primeiras ocasións chegaron pola banda dereita, con centros de Saro que non atoparon rematador por moi pouco. 
Santi, Primo, Ares, Cardeñosa... Moitos foron os que buscaron poñer en apuros a Cristopher sen sorte topándose cun muro defensivo moi forte e seguro. Así é que un gran número de chegadas non puido chegar a bo porto merecendo aínda así chegar ao tempo de lecer por diante no marcador. 

Moito perigo á contra. 
O plan estaba claro. Ante unha Esedé á que lle gusta xogar coa pelota a mellor idea era defender todo o posible e buscar a portería defendida por Lucas á contra aproveitando a velocidade dos seus atacantes. Con moito perigo en cada oportunidade, Rodri asinou a primeira ocasión visitante cun disparo picado que saiu por enriba do longueiro. 
Logo dun primeiro tempo no que non foron quen de crear máis oportunidades perigosas, máis sorte tiveron logo do paso por vestiarios, cando cambiou o rumbo do partido. Lucas tivo moito traballo durante os primeiros vinte minutos e, entre esas importantes ocasións, chegou o gol. Un gol de Iago López logo dun centro ao primeiro pau de Aarón e ante o que nada puido facer tanto a defensa coma o gardamallas branquiazul. 

Emoción en aumento. 
Media hora dende o gol do Bergantiños ata un final no que puido pasar calquera cousa. O Compos, que case non provocara perigo nos primeiros intres do segundo tempo, volveu ao guión da primeira parte. Posesións longas, buscando con insistencia ocos nunha defensa formada por once homes. Con todo isto, os nosos tiveron ata o final a oportunidade de, polo menos, empatar.
Xogando os dez minutos finais en campo contrario, o gol da igualada puido chegar xa no engadido. Centro dende a banda esquerda, Cristopher e Sobrido saltan á vez sen conseguir chegar ningún a unha pelota que lle cae a Primo e este non perdoa. O colexiado, non obstante, decidiu anular o gol interpretando que houbo falta sobre o gardamallas.

Finalmente, o Compos segue no máis alto da clasificación con tres puntos por enriba do Bergantiños e supera en trece puntos ao quinto clasificado, o Somozas. Agora, para volver ao camiño da vitoria, o equipo debe preparar agora a visita á Lomba de Ponteareas para enfrontarse a un Cultural Areas metido de cheo na loita por non descender. 

ALIÑACIÓN: Lucas; Saro, Cardeñosa, Casas, Naveira; Mon, Tomás; Alex Ares, Róber (Sobrido, min. 79), Santi (Diego Rey, 58); e Primo. 
CARTÓNS: Amarelo para Naveira. 
GOLES: 0-1 62' Iago López. 
CAMPO: San Lázaro.

Máis que tres puntos

Este domingo chega algo máis que unha final. Un enfrontamento no que haberá máis que tres puntos en xogo no que a día de hoxe é o mellor encontro da Terceira galega. O líder e o segundo clasificado enfróntanse con ámbolos dous conxuntos inmersos nunha loita á que aínda lle faltan 13 capítulos, co desta fin de semana cobrando moita máis importancia. En San Lázaro medirán as súas forzas un Compos histórico e un Bergantiños cuns números moi semellantes e que non quere perder de vista o gran privilexio que otorga o ser campión da categoría.
A día de hoxe, seis puntos separan aos dous equipos nunha clasificación na que non está a ser nada doado afastarse dos seus perseguidores. 60 puntos dos nosos ante 54 dos carballeses, máis de 100 goles entre os dous conxuntos e con dous dos tres máximos anotadores da categoría sobre o campo dun San Lázaro onde se espera unha boa entrada malia a subida de prezos por mor do 'Día do clube'.


Números de líder.
Despois de 25 xornadas moi interesantes e importantes na Terceira galega, o Bergantiños suma uns números case inigualables. De feito, tal é así que nos dez últimos anos só tres líderes a estas alturas superan os 54 puntos do cadro bergantiñán. Só Compos, Cerceda e Racing de Ferrol, este superando tamén os 61 dos nosos, baten os números en canto a puntos mentres que unicamente o cadro ferrolán e o Narón, hai xa unha década, melloran ao equipo dirixido por Miguel Figueira con, tamén, uns datos envexables.
17 triunfos, 3 empates e 5 derrotas, unha delas ante o Compos nas Eiroas, avalan a un equipo que suma un total de 51 goles, 2 de media por partido, e que recibiu só 18 sendo o mellor equipo defensivo xunto co Barco e conseguindo a mellor diferenza de goles igualados co líder, con sete goles máis tanto anotados coma encaixados.
O mellor equipo cando se trata de xogar ante a súa propia afección, con só dous empates e unha única derrota sufrida ante os nosos ademais de dez vitorias, é o terceiro mellor cando sae lonxe das Eiroas. A domicilio só foron quen de gañar en sete ocasións e un empate no García Calvo contra o Negreira. En canto a derrotas, marcharon do Couto, Espiñedo, Santa Mariña e A Magdalena sen puntos nin goles ao seu favor recibindo dous goles no Carballiño sendo a derrota máis avultada do que vai do curso.
A nivel individual hai moitos xogadores que salientar. Comezando con Borja Facal, capitán do clube carballés e un dos seguros sobre o verde, e seguindo co outro ex da Esedé Nacho, o que máis chama a atención son, a día de hoxe, os números de Rubén Rivera. O dianteiro coruñés suma un total de 15 goles xogando case tódolos minutos cos seus e superando por un a Primo.

A defensa, o máis importante.
Un Compos que encaixou só un gol máis dende a sexta xornada que nas cinco primeiras amosando unha mellora moi importante recibirá a un Bergantiños que suma dous goles de media por partido. Ante isto, hai algo moi claro: hai que deixar a porta a cero contra un equipo que quedou sen marcar nas súas cinco derrotas.
Non obstante, malia ser dous equipos con moito gol, de cumprirse o guión non se verán moitos goles en San Lázaro nun partido que se gañará dende os bancos. Un encontro que se prevé táctico e que, ao igual que na primeira volta, gañará o que sexa quen de adiantarse. Hai que salientar tamén que, malia non ver porta en cinco encontros, o Bergantiños non rematou ningún partido con empate sen goles.
O Compos, que está a facer unha tempada para o recordo, terá diante un rival de categoría para buscar a que pode ser a undécima vitoria consecutiva no mesmo campo no que consumou a súa última derrota ata o de agora, alá polo mes de outubro contra o Barco.

Un Clásico do noso fútbol.
Esta será a décima ocasión na que Compostela e Bergantiños se enfronten, quinta en Santiago. E, dende a primeira cita hai 32 anos, resultados igualados cos nosos conseguindo gañar catro dos últimos cinco enfrontamentos, dous deles en San Lázaro.
Na capital galega, o Bergantiños só foi quen de sumar de tres no primeiro precedente, que rematou con vitoria pola mínima para os de Carballo. Tamén houbo goles, un por lado, na seguinte ocasión na que se enfrontaron en Santa Isabel conseguindo o Compos o primeiro punto na casa contra este rival. Máis sorte houbo nas dúas últimas visitas dos carballeses a San Lázaro, cun 3-0 en 2013 e un 4-2 a pasada tempada, con goles de Tomás, Rubén, Taboada e Mon.
En canto ao último precedente, que data de outubro do pasado ano nesta mesma tempada, o resultado, aínda que curto, foi moi positivo para os nosos. Un so gol de David Uña aos dez minutos foi suficiente para encadear o que era a segunda vitoria consecutiva a domicilio despois de bater ao Barbadás sete días antes.

Con todo.
Despois de perder a pasada xornada a Naveira e Santi por acumulación de amoestacións, Yago Iglesias poderá contar para este partido con todos os seus homes. Non obstante, Róber e Alex Ares chegarán a este partido despois dunha viaxe a Benidorm e un partido o pasado mércores co combinado galego amateur, que non foi quen de dar a volta á eliminatoria.
Pensando na visita á Lomba de Ponteareas, Róber e Samu chegan a esta cita con catro cartóns amarelos, polo que non poderían estar ante a Cultural Areas de ver un novo cartón ante o bergantiñáns.

Día do clube, día de Compos.
O domingo ás 17 horas, San Lázaro abrirá as súas portas para acoller un dos mellores partidos do curso. Para o encontro, que como xa dixemos é considerado como 'Día do Clube', terán que pasar por taquilla tamén os aboados. As entradas terán un prezo de 15 euros para os non aboados maiores de 18 anos e o prezo habitual de 5 euros para os rapaces entre 13 e 17 anos. Por contra, os aboados maiores de idade terán que pagar 5 euros. Poderán retirarse tanto nas oficinas do estadio coma na taquilla o mesmo día de partido amosando o carné de socio e o DNI.
Para quen non poida achegarse ao teatro branquiazul, poderá seguirse en directo a través das diferentes redes sociais da Curva Branquiazul, Facebook e Twitter, así como no perfil oficial do clube en Twitter. Ademais, poderá escoitarse en directo en 'Esedé Radio', na web oficial.

A Nosa Loita (Xornada 26)

Unha semana máis desputada na Terceira galega e unha semana menos para chegar ao obxectivo dun Compos que se aproveitou a pasada fin de semana dos demais resultados. O cadro de Yago Iglesias sumou de tres unha semana máis, e van dez consecutivas, mantendo os seis puntos de diferenza con respecto ao Bergantiños, que tampouco perdoou. Ademais, nin Barco, Racing Vilalbés, Somozas nin Silva foron quen de gañar co Alondras aproveitándose para colocarse quinto. Así, a Esedé pecha a xornada 25 con dezaséis puntos máis ca o cadro cangués.

Xornada redonda.
Comezamos cun partido moito máis complicado do que facía pensar a clasificación. O Compos superou pola mínima, cun gol de Róber, a un Barbadás que buscou dar a sorpresa no campo onde os nosos sumaron a súa última derrota ata o momento, alá polo mes de outubro. Non obstante, o equipo branquiazul soubo controlar o xogo e mantivo a súa vantaxe, curta pero suficiente, grazas a unha gran actuación tanto da defensa coma de Lucas. Por parte do conxunto ourensán hai que salientar a gran imaxe que amosou o porteiro Rui, pesadelo dos atacantes locais.
Os mesmos problemas os deu o Negreira nas Eiroas. O Bergantiños, obrigado a gañar para non perder de vista o primeiro posto, contou con numerosos problemas para bater a portería defendida por Rodri. Os de Nacho chegaron ao treito final sen conseguir ver porta ata que, a catro minutos para o final, Borja Facal fixo o primeiro. Menos de dous minutos máis tarde, Pablo Antas pechou o partido co segundo gol, sen tempo posible de reacción.
Once xornadas despois chegou a derrota. O Barco sumaba un total de catro vitorias consecutivas e seis máis sen perder ata que chegou un Laracha que busca fuxir dos postos de descenso coa segunda vitoria seguida, terceira xornada sumando. Ao igual que no partido xogado en Carballo, o Barco non foi quen de superar ao cadro en principio inferior mais nesta ocasión foi o cadro larachés o autor dun gol. A tres minutos para o final, Álvaro asinou o único gol co que volveron ao Municipal con cinco puntos máis ca o Negreira.
O gran partido da xornada, o que se xogou no Candocia entre Somozas e Racing Vilalbés, rematou igual que arrincou. Empate sen goles nun xogo onde estaba en xogo o cuarto posto e no que o cadro lugués pagou moi caro o manter a súa posición privilexiada con este punto con dous expulsados e cinco amoestados máis. O Somozas, pola súa parte, mantén a sexta posición igualado a puntos co quinto e o sétimo.
Esta última xornada entrou de cheo na pelexa o Alondras. O equipo cangués encadea 6 xornadas sen perder e conseguiu achegarse así ao que semella ser o seu obxectivo principal. Quintos clasificados, superaron a pasada fin de semana a un Choco que se conformará esta tempada con acadar a permanencia. Jonas, o gran protagonista da tarde, asinou os dous goles no Morrazo no encontro que abriu a xornada.
Para rematar, un enfrontamento entre dous equipos que poderían rematar a tempada nos postos altos. Arousa e Silva, oitavo e sétimo respectivamente, deixaron un bo partido con goles e emoción que coloca ao cadro vilagarcián a catro puntos do Racing Vilalbés. Xa no segundo tempo, o Silva adiantouse grazas a un gol de Movilla ao que rápido contestou Vitra para os locais. Xa no engadido, Sergio Santos confirmou a remontada vilagarciá co segundo e definitivo.

Máis que tres puntos.
A xornada 26 chega con ata catro partidos moi fortes e importantes na Terceira galega. Entre eles salienta o que se xogará en San Lázaro entre Compos e Bergantiños no que os carballeses xogaranse as súas opcións de manterse na loita polo primeiro posto. Ademais, Racing Vilalbés e Barco completarán os enfrontamentos entre os catro primeiros. O resultado anterior buscarán aproveitalo Silva e Alondras mentres que o Somozas visitará Barraña.
Con horario xa coñecido, o partido marcado como 'Día do clube' en casa Compos e polo que haberá que pasar por taquilla, o mellor encontro da xornada, un dos mellores que se poden ver no fútbol galego a día de hoxe, enfrontará á Esedé cun Bergantiños que non perde dende a primeira cita do ano. A histórica xeira de 10 vitorias consecutivas, en xogo contra un rival de gran nivel. Domingo ás 17 horas.
A Magdalena agocha a terceira posición. O Racing Vilalbés, cuarto, recibirá na súa casa ao Barco, terceiro, noutro dos partidos na parte máis alta da clasificación e sobre o que estarán postos máis ollos. Deste resultado poderían aproveitarse ata tres equipos, que tamén xogarán entre si nesta fin de semana moi completa. Domingo ás 16:30 horas.
Na Grela, poderán verse a dous equipos igualados a puntos. O Silva recibirá ao Alondras dende a sétima praza cun empate na táboa que buscarán desfacer co cuarto posto moi preto e que un deles podería asaltar de conseguir un bo favor do Barco. Abrirán a xornada do domingo co encontro ás 12 da mañá.
E rematamos cunha nova cita en Barraña. O Boiro, que pechou unha mala xeira de tres derrotas consecutivas, recibirá a un Somozas que suma ata o de agora catro xornadas sen gañar, un mal momento que o fixo perder o cuarto posto. O cadro da Ferrolterra, non obstante, buscará aproveitar os enfrontamentos dos seus predecesores na táboa para volver á promoción de ascenso. Pecharán a xornada dende as 17:15 horas.

Vitoria fría

O Compos acadou a súa décima vitoria consecutiva a costa dun Barbadás que pelexou ata o final merecendo un premio superior. Un partido complicado para un equipo que pasou de dominar gran parte do primeiro tempo a sufrir máis do esperado no segundo. Cun resultado curto pero suficiente para sumar de tres, os de Yago Iglesias seguen a seis do segundo, o Bergantiños, e amplían a diferenza con respecto ao terceiro ata os dez puntos e a dezaséis do quinto. Róber, autor do gol do triunfo. 


Comezo perfecto.  
Durante todo o tempo que estivo sobre o terreo de xogo, case oitenta minutos, Diego Rey foi o dono da banda esquerda. O extremo, que foi titular por primeira vez no curso, convertiuse no peor pesadelo da defensa do Barbadás con numerosas chegadas polo costado do ataque branquiazul. Ademais, o asturiano foi tamén o creador da xogada do que sería o único gol do encontro.
Con tres minutos xogados, o ex de Somozas e Levante, recibiu a pelota, cruzou a área con parede con Alex Ares incluida e pase para Róber, que non perdoou ante Rui, o mellor dos seus evitando a que puido ser unha diferenza maior e coa posibilidade de marcar nos minutos finais do xogo.
O gol non foi máis que a maneira de abrir o que sería un tempo de dominio case total dos nosos, aínda que sen conseguir superar de novo ao gardamallas portugués con Diego Rey e Róber como protagonistas das mellores oportunidades nos metros finais do campo barbadés. De feito, ata tres ocasións máis levaron o selo dos dous xogadores da Esedé, sen sorte de cara a porta en ningunha. 
O dominio foi superior co paso dos minutos co Compos xogando en gran parte do tempo en campo contrario. Por parte do Barbadás, defensa forte e presión fóra da área sen permitir aos nosos sequera achegarse aos metros finais. Por contra, eles tampouco foron quen de poñer en perigo a portería defendida por Lucas sorprendendo aínda máis no segundo tempo. 

O Barbadás buscou o gol. 
O Compos saltou ao terreo de xogo logo do paso por vestiarios coa única intención de pechar o encontro canto antes. Non obstante, despois de tres oportunidades claras que non foi quen de materializar a dianteira branquiazul, o Barbadás tomou o mando do partido para poñer en serios apuros a vitoria local. 
Contra un equipo incapaz de transformar as súas mellores chegadas, os ourensáns levaron moito perigo en cada contra aproveitando a súa velocidade para, en menos de cinco minutos, asinar as súas mellores oportunidades ante un Lucas que amosou gran seguridade e velocidade á hora de evitar un susto maior.
Con moitas máis interrupcións e nervios ca no primeiro tempo, os dous equipos buscaron un gol que non chegou na segunda parte. O Compos, case sen sorte, tivo unha moi clara nas botas de Primo a menos de cinco minutos para o final co que se podería pechar o xogo. Pola súa parte, o Barbadás mantívose preto da porta de Lucas atacando con once nos minutos finais obtendo dous corners moi perigosos que a piques estiveron de saír moi caros aos nosos.

Finalmente os tres puntos quedan en Santiago e a vindeira fin de semana visitará San Lázaro un rival máis que perigoso. O Bergantiños, que chega logo de superar ao Negreira, será o seguinte que buscará medir a un Compos que, de sumar de tres, tería un pé na promoción de ascenso con case tres meses de antelación. 

ALIÑACIÓN: Lucas; Saro, Casas, Uña, Sergio; Mon, Tomás; Diego Rey (Rubén, min. 79), Alex Ares (Samu, min. 87), Róber (Sobrido, min. 68); e Primo. 
CARTÓNS: Amarelo para Sergio.
GOLES: 1-0 3' Róber.
CAMPO: San Lázaro. 

Que o frío non sexa escusa

Compos e Barbadás terán este domingo en San Lázaro unha nova final para os dous conxuntos nas súas respectivas pelexas ata o final do curso. O equipo da capital galega terá que superar a un novo rival no seu camiño cara á promoción de ascenso coa posibilidade de encadear o décimo triunfo consecutivo. Pola súa parte, o cadro ourensán saltará ao terreo de xogo coa obriga de superar aos nosos na busca dunha permanencia que se presume complicada neste final de tempada.


O peor visitante.
O Barbadás non está a facer a súa mellor tempada precisamente. O equipo ourensán, que visitará San Lázaro coa intención de rematar co seu mal ano a domicilio, terá que verse as caras co sexto mellor clasificado na táboa de locais, un Compos moito máis regular lonxe de Santiago. Un partido que semella moi desigualado cos dous equipos obrigados a loitar polos tres puntos.
Décimo oitavo na clasificación, o Barbadás asinou un total de 20 puntos en 24 xornadas. 6 vitorias, 2 empates e 16 derrotas, datos aos que engadir os 17 goles anotados, que o confirman coma o equipo con máis problema á hora de ver portería, e os 41 en contra, que o sitúan coma o quinto equipo con máis tantos recibidos.
Ante a súa afección conseguiron o 80% dos seus puntos, 16 de 20, conseguindo un so empate ante o Choco sen goles. Ademais, conseguiron importantes triunfos ante equipos da zona alta como son Racing Vilalbés e Boiro. Por contra, as cousas non son tan positivas a domicilio. Lonxe dos Carrís só puideron sumar de tres contra en Espiñedo, contra o Arenteiro, e un empate no San Lázaro de Noia cun total de catro goles. Nesta caso hai que lembrar que só puideron facer 8 goles mentres que recibiron 31 con goleadas contra o Barco (6-0), Arousa (4-1), Silva (3-0) ou Racing Vilalbés (3-0).
A nivel individual, dous xogadores sobresaen por enriba do resto no que vai de tempada. Caique e Alberto Marcos suman os dous 4 goles mentres que oito xogadores máis se reparten os demais tantos cun gol cada home.

Dous de dous por dous.
Ata o de agora, Compos e Barbadás enfrontáronse en partido oficial ata en dúas ocasións en San Lázaro. Dous precedentes, que datan de 2012 e 2016, e que remataron con resultado máis que positivo para os nosos. De feito, como dato curioso, os dous xogos remataron cun 2-0 no marcador, obra de Gonzalo e Franqueira na primeira cita e Santi e Martín a pasada tempada con ámbolos dous tantos nos dez minutos finais.
Na primeira volta, nos Carrís, os tres puntos viñeron camiño de Santiago grazas a un gol de David Uña no segundo tempo. Un gol do central madrileño que foi suficiente para sumar a primeira vitoria logo de dúas derrotas consecutivas.

Dez de dez?
Arestora, o Compos acumula unha gran xeira de nove vitorias consecutivas, algo que ningún equipo das tres categorías superiores foi quen de acadar. En xogo estará a décima seguida aumentando así o mellor momento da historia do clube, salvando as distancias. A iso hai que engadir cinco xornadas máis sen coñecer a derrota.
Para ver a última vez que non foron capaces de puntuar os nosos hai que remontarse ata o mes de outubro. En San Lázaro, onde se asinaron dúas das tres derrotas do curso, o Barco puido marchar cos tres puntos. No mesmo escenario, dúas semanas despois, o Arousa fíxose co último punto que saiu de Santiago ata o de agora. Dende aí, cinco vitorias consecutivas dos nosos na casa cun total de 13 goles a favor e 2 en contra, os dous ante o Noia.
Unindo tanto as cinco vitorias e o empate colleitados no teatro branquiazul e as seis vitorias e outros dous empates dan un total de 14 xornadas sen coñecer a derrota, dato que buscarán aumentar esta fin de semana ante o cadro ourensán. Ademais, neses case catro meses, o equipo dirixido por Yago Iglesias leva unha xeira envexable de 9 triunfos consecutivos.

Superados os números do ano pasado.
Despois de 24 xornadas, o líder da Terceira suma xa 57 puntos grazas a 18 vitorias, 3 empates e outras tantas derrotas. Un equipo co camiño ao gol gravado na pel superando o conseguido ao final da pasada campaña, cando o conxunto tamén adestrado por Yago Iglesias acadou 62 puntos con 17 vitorias, xa superadas, e 11 empates.
Superado o número de vitorias do pasado curso, agora ten a tiro superar os 21 triunfos das tempadas 2012/13 e 1993/94, ámbalas dúas rematadas con ascensos importantes. Por diante quedarían os 25 triunfos da 2008/09, os 26 da 2011/12 e os 27 da 1989/90, aínda superables.
En canto á categoría, só o Racing de Ferrol hai cinco anos conseguiu no mesmo tempo un total de 60 puntos mentres que o Fabril, hai xa doce, sumou 58 sendo os últimos en conseguir máis ca os nosos en 24 xornadas.

Dúas baixas ben pensadas.
Coa finalísima ante o Bergantiños unha semana despois, o Compos terá dúas baixas importantes esta fin de semana pensando en chegar seguro á seguinte xornada. Naveira, que se fixo cun oco no once nas últimas xornadas, e Santi, que está a ser o mellor socio de Primo en ataque, non poderán estar despois de ver o quinto cartón amarelo a pasada fin de semana. Pola súa parte, Samu e Róber chegan apercibidos de sanción de ver un cartón ante o Barbadás.

Que ninguén falte!
O domingo ás 17 horas chega unha final para dous equipos en momentos moi diferentes. San Lázaro acollerá un partido para o que as entradas estarán a un prezo, habitual, de 10 euros para maiores de 17 anos, 5 euros para rapaces entre 13 e 17 anos e de balde para menores de 12. Por outro lado, cada aboado poderá retirar ata dúas entradas sen coste algún antes do venres pola tarde ao igual que se sortean en diferentes redes sociais coa intención de aumentar o número de afeccionados neste treito final do campionato.
Quen, por contra, non poida achegarse ao 'teatro dos soños branquiazul' poderá seguilo en directo a través das diferentes redes sociais da Curva Branquiazul, Facebook e Twitter, ou ben no perfil oficial do clube en Twitter. Ademais poderá escoitarse en directo a través de 'Esedé Radio', na web oficial do clube.