Novo curso

Arrinca un novo curso en San Lázaro e un novo obxectivo para o clube da capital galega. Logo dun ano que serviu para coller forzas e aprender algo máis da categoría, o Compos comeza esta nova tempada coa misión de volver a categorías nacionais alá polo mes de xuño.
Nesta primeira data do campionato 2017/18, San Lázaro abrirá as súas portas para recibir ao Club Silva SD, equipo coruñés que militará na Terceira por cuarto ano consecutivo coa misión de mellorar o 9º posto colleitado a pasada tempada e que marca a súa mellor posición histórica. Un partido que servirá, sobre todo, para coñecer se o noso equipo ten, dende un principio, nivel para loitar polo primeiro posto.


Catro anos.
O Silva conseguiu un ascenso histórico á Terceira división no ano 2014 logo de superar ao Vilalonga na eliminatoria entre terceiros. Dende esa tempada, tres anos consecutivos do conxunto coruñés acadando a permanencia e loitando, o ano pasado, por algo mellor ata o treito final do campionato, cando perderon a oportunidade matemática de facerse un oco entre os catro primeiros.
Malia perder pezas importantes, o Silva de Bardanca reforzouse este verán cambiando a gran parte dos seus efectivos procedentes de equipos importantes tanto da Terceira coma de Preferente. Sen dúbida, un equipo que sempre dá problemas e que nesta pretempada, logo de mes e medio de traballo, gañou un total de 7 partidos de 9 xogados, perdendo só ante o Depor e empatando sen goles ante o Racing de Ferrol, caendo logo nos penaltis na Copa Deputación. Un equipo que, por outro lado, segue vivo na Copa RFEF e que chegará logo dun partido máis este mesmo mércores.

Repetimos?
Aínda con opcións de entrar na promoción de ascenso, o Silva visitaba San Lázaro a nove xornadas para o final do campionato. Un equipo forte e que chegaba nun bo momento á capital galega para medir a un Compos que amosou, unha fin de semana máis, o seu bo traballo na casa.
O partido, pola mañá e ante non moito público, arrincou do mellor xeito posible. Un gol de Nogueira poñía o camiño un chisco máis fácil para os nosos ante un Silva que non foi quen de repoñerse. Xa no segundo tempo, repetiu Nogueira e Recoba confirmou a vitoria branquiazul, que aínda tería un final mellor. Dende os once metros, Renan Zanelli fixo o gol silvista que non chegou a incomodar a ninguén xa que, cinco minutos despois, Ube devolveu os tres goles de diferenza ao marcador, distancia que aumentou minutos despois Santi pechando o 5-1 definitivo.
Outro dato que destacar é que dese equipo hai un total de nove xogadores, dos catorce que defenderon a camisola compostelanista, que repiten no plantel, aínda que tanto Diego Rey coma Ube poderían non estar por lesión.

Primeiro exame serio para as fichaxes.
Sen dúbida, as novas incorporacións da Esedé deixaron moi boas sensacións durante toda a pretempada. Goles e bo xogo fixeron que os sete recén chegados se gañaran un posto no once titular, polo menos durante a preparación do curso.
Todos contaron máis ou menos co mesmo tempo de xogo, agás Primo por lesión e Sobrido, que chegou a falta de dous partidos, e deron o mellor de eles mesmos sobre o campo. Tal foi así que entre os sete asinaron un total de dez goles sendo Sergio e Naveira os únicos que non viron portería polo de agora.
Róber, que xogou por detrás dos dianteiros, foi sen dúbida o que mellor amosou a súa facilidade de cara a porta con 3 goles. Ares e Primo anotaron 2 cada un e Sobrido, en só dous encontros, asinou outros 2. Por último, Álvaro Casas fixo un gol máis, o primeiro do Compos 2017/18.

Quen defenderá a porta?
Sen dúbida, os dous porteiros que defenderán este curso a porta da Esedé deixaron moi boas sensacións durante toda a pretempada complicando a decisión final a Yago Iglesias. Os dous compartiron case os mesmos minutos sobre o terreo de xogo e no total só se diferencian nun gol, xa que Lorenzo encaixou 7 tantos e Lucas 6.
A pasada tempada, Lucas foi o dono da portería branquiazul durante gran parte da tempada, perdendo o posto durante unhas xornadas en favor de Cedrón e xa sen nada en xogo ante Lorenzo. Haberá troco na portería este curso ou seguirá Lucas sendo o dono habitual?

Un de cinco.
O Compos non arrinca a tempada na casa por segunda vez nos seis últimos anos. De feito, ese único enfrontamento en San Lázaro foi a única vitoria branquiazul nunha primeira xornada dende o ano 2011, cando superaron, tamén a domicilio, ao Unión de Asados en Preferente.
Unha vitoria, en 2014 ante o Burgos en Santiago, foi o mellor resultado ao que acompañan catro malos a domicilio. En 2012 tampouco se arrincou con derrota, na tempada do ascenso, cun empate a un gol en As Somozas. Ademais, derrotas ante Ourense, Logroñés e Fabril nos que o noso equipo chegou a encaixar un total de 9 goles e só anotou un, na derrota por 5-1 en Abegondo o pasado ano.

Dúas baixas e unha dúbida.
A día de hoxe, só se pode falar de dúas ausencias seguras para esta estrea. Diego Rey, que aínda non puido contar con minutos dende a volta ao traballo, e Ube, que caeu mancado no comezo do partido ante o Lugo, serán baixas seguras para o partido por lesión. Pola súa parte, Primo será dúbida ata última hora por un golpe.

Volta a casa.
O 25 de xullo, San Lázaro abriu as súas portas para o 'II Memorial Antonio Bermúdez'. Un partido interesante e importante ante o Clube Deportivo Lugo e que serviu, en gran parte, para contar coa presentación do equipo na casa. Pois ben. 26 días despois, o teatro dos soños de Santiago acollerá o primeiro partido da Esedé de liga na casa. Será o domingo día 20 deste mes de agosto ás 19 horas coas entradas para non socios aos prezos habituais: 10 euros para maiores de idade, 5 euros para rapaces entre os 17 e os 13 anos e de balde para menores de 12 anos.
Quen non poida asistir ao encontro poderá seguilo a través das redes sociais da Curva Branquiazul, Facebook e Twitter, ou ben no perfil oficial en Twitter do Compos.

Bo final

O Compos pechou a pretempada 2017/18 cunha nova vitoria ante un rival de nivel inferior nun partido onde houbo que, de novo, amosar a capacidade de reacción coa que conta o equipo. Remontada ante o Puebla cun equipo onde se estrearon Adrián e Yago, os dous no once titular, e no que o dianteiro foi quen de anotar un gol importante, o segundo.


Remontada.
O Puebla saiu ao terreo de xogo con intencións de sorprender aos rivais e aproveitar calquera erro para e así é que Viturro puido adiantar aos locais superados os dez minutos sorprendendo sobre o terreo de xogo do Campo de Cadreche. 
Malia xogar cun once moi diferente ao que Yago Iglesias usará durante a tempada, o equipo branquiazul non baixou os brazos e buscou a porta pobrense con todo conseguindo igualar o resultado antes da media hora de xogo dende os once metros. Penalti sobre Cardeñosa, claro, e gol de Tomás. 
Co empate, as ocasións a prol da Esedé sucedéronse pero non foi ata o último minuto do primeiro tempo cando Yago, que se estreaba sobre terreo de xogo co primeiro equipo, anotou o tanto da vitoria a pase de Alberto. 

Bo final.
Con este triunfo caeu do lado compostelán a sexta vitoria da pretempada a sete días para arrincar a tempada oficial na casa ante o Silva. Ademais, nos nove partidos xogados, 19 goles a favor e 13 en contra caendo só ante Lugo e Noia, que está a facer unha gran pretempada chegando á Final da Copa Deputación.
Agora, hai que agardar ata o vindeiro domingo para recibir ao Silva en San Lázaro no comezo da volta da Esedé á Segunda B.

ALIÑACIÓN: Lucas; Sergio, Adrián, Cardeñosa, Queiruga, Saro; Samu, Alberto; Rubén, Tomás e Yago.
CARTÓNS: -.
GOLES: 1-0 11' Viturro, 1-1 27' Tomás, 1-2 44' Yago.
CAMPO: Cadreche.

E fin

O Compos pon punto e final á pretempada cun último torneo amigable. Unha festa fóra de Santiago para celebrar a 43 edición do 'Trofeo Conde de Fenosa', que se xoga no Campo da Alta, na Pobra do Caramiñal. Un torneo no que non será a primeira aparición dun equipo da Esedé xa que alá polo ano 2011, a final foi un Deportivo de veteranos contra o Compos de veteranos.


Fin da pretempada.
A unha semana exacta para o comezo da liga 2017/18 e menos de 24 horas despois de rematar o enfrontamento ante o Racing Vilalbés na Magdalena, o Compos pon punto e final a unha preparación que semella non deixar todas as boas sensacións que se esperaban do noso equipo. Si ben é certo que as novas fichaxes están a demostrar un gran nivel, os resultados non son tan bos como poderían con derrotas importantes, e mal xogo, coma a sufrida ante o Lugo ou ante o Noia. Por contra, tamén hai que falar de bos resultados coma as vitorias ante Negreira, Cerceda ou Céltiga, facendo bo fútbol.
En total, o Compos pon o final a esta pretempada con 5 vitorias, 1 empate e 2 derrotas deixando, ademais, un mal sabor de boca na curta participación na Copa Deputación, onde o Noia segue a sorprender gañando a algúns favoritos de cara ao ascenso como son Compos e Bergantiños, prantándose nunha difícil semifinal ante o Boiro.

O Puebla, con tempo.
O equipo local, o Puebla, chega a este partido con dúas semanas máis para preparar a súa estrea nunha nova tempada na Primeira Autonómica. O equipo de Anxo Casalderrey quedou ás portas do ascenso a pasada tempada logo de rematar cuarto e este ano buscarán volver á Preferente Norte da man do ex adestrador da Esedé.
Esta tempada, no grupo 2 da 1ª galega, comezarán a liga o 3 de setembro na casa ante o Silleda.

Sen pezas importantes.
Yago Iglesias contará para este partido, de novo, con tres baixas importantes. Ube estará fóra dos terreos de xogo entre un mes e mes e medio por unha escordadura grave de nocello. Primo, cun golpe, estará dispoñible para o encontro ante o Silva. E Diego Rey, que todavía non puido probarse neste novo curso, seguirá de baixa unhas semanas máis.

Festa, sol e calor.
Este domingo, excursión á Pobra do Caramiñal con todo de cara para pasar unha boa tarde-noite de praia e fútbol. Co bo tempo que hai agora na nosa terra, non pode haber mellor plan que pasar o día gozando do verán para rematar no Campo de Cadreche ás 19 horas vendo un interesante Puebla-Compos.
Quen non poida asistir ao encontro, como é habitual, poderá seguilo en directo a través das redes sociais da Curva Branquiazul, Facebook e Twitter.

Campións do Trofeo President

Chega a San Lázaro un novo trofeo da SD Compostela. O Compos fíxose en Vilalba co Trofeo President ante o Racing Vilalbés deixando, a oito días para o arrinque da liga, unha moi boa imaxe ante o que podería ser un dos rivais claros de cara a entrar na promoción de ascenso. 
Vitoria con remontada incluida contra un Racing Vilalbés que non puxo as cousas nada fáciles e que se adiantou no primeiro tempo malia verse superado claramente por un Compos que, de novo, amosa problemas á hora de finalizar con acerto as moitas ocasións que crea.


Perdoar non acaba ben. 
O Compos foi moi superior sobre o campo da Magdalena ante un Racing Vilalbés que non sacou todo o mellor co que conta no equipo mais a sorte non estivo do lado branquiazul, que perdoou as tres primeiras ocasións das que gozou dando ao conxunto local a oportunidade de poñerse por diante. 
Superado o ecuador da primeira metade, despois de dúas oportunidade moi claras de Sobrido perdoadas diante do porteiro, Moreda non errou ante Lorenzo logo de roubar a pelota rematando cunha posible ocasión perigo branquiazul. 
Era o momento de reaccionar. Había que dar a volta ao marcador e, cun once moi ofensivo, non tardaron en chegar as ocasións de novo sobre a porta lucense. Róber e Santi tiveron a oportunidade de igualar o resultado en cousa de cinco minutos pero non foi ata algo máis de dez minutos máis tarde cando o dianteiro branquiazul asinou a igualada logo dunha xogada individual de Alex Ares e asistencia de Saro.

Efectividade.
A segunda metade foi semellante á primeira co Compos superando ao Racing Vilalbés sen demasiadas complicacións. A iso hai que engadir que, de novo, Santi foi quen de bater ao porteiro contrario a pase de Mon e asinando un dobrete importante a pouco tempo de recibir ao Silva amosando que, ademais, pode xogar ben sen ser o único punta. 
Ao anterior hai que engadir que, durante a segunda metade, Yago Iglesias probou a Casas no posto de central colocando a Samu e Mon no centro do campo. 

Un resultado moi positivo coa mirada posta no derradeiro partido da pretempada, en menos de 24 horas, ante o Puebla na Pobra do Caramiñal e na visita do Silva a San Lázaro o vindeiro domingo. 

ALIÑACIÓN: Lorenzo; Saro, Cardeñosa (Samu, min. 46), Uña, Naveira; Mon, Casas; Ares, Santi, Róber; e Sobrido.
CARTÓNS:  -.
GOLES: 1-0 25' Moreda, 1-1 37' Santi, 1-2 50' Santi.
CAMPO: A Magdalena.

Á casa de Make

O sábado teremos a penúltima cita antes do comezo da tempada oficial. Xusto oito días antes de arrincar a liga, teremos unha cita importante ante un rival co que, logo, haberá que loitar por ser un dos catro primeiros clasificados. E é que o Racing Vilalbés convidou aos nosos a xogar un torneo amigable na Magdalena para case pechar a preparación, só a falta de visitar ao Puebla o martes.


Un novo torneo amigable.
Logo de tres torneos amigables e con outro máis por xogarse o vindeiro martes, o Compos terá este sábado a oportunidade de facerse por primeira vez co Trofeo President de Vilalba, logo de caer hai xa sete anos por un contundente 4-0 con homes coma Roberto Piñeiro, Imanol ou Paco, que anos despois conseguirían o último ascenso á Terceira división.
Un torneo que contará este ano coa súa vixésima edición logo da súa creación en 1997 e que contou con convidados coma o Boiro, Somozas ou Deportivo B e que, para esta edición, fará o propio cun gran Compos que buscará manter o bo nivel que amosou no Triangular do Praíña. 

Medio ano.
Aínda non hai seis meses que o Compos pisou por última vez o campo da Magdalena. O 25 de febreiro, para ser exactos, a Esedé caía ante o Racing Vilalbés a domicilio nun partido importante que rematou con vitoria local por 2-0, con goles de Rubén Gómez e Caballero. Ademais, hai que engadir que se verán as caras de novo no campo lugués no mes de setembro, na xornada 4.
Ao anterior hai que sumar un dato máis. E é que o Compos non gañou aínda no feudo vilalbés conseguindo só un puntos de seis posibles, algo que se compensa coas dúas vitorias branquiazuis en San Lázaro. 

Sete. 
Logo de case un mes, a Esedé xogará este sábado o seu sétimo encontro de pretempada. Seis precedentes que remataron con vitoria ante Negreira, Dubra e Céltiga e Cerceda no triangular, un empate ante o Fabril e dúas derrotas ante Lugo en San Lázaro e Noia na Copa Deputación.
Pola súa parte, o Racing Vilalbés enfrontouse este verán ao Deportivo, o Polvorín, un triangular ante o Monterroso e de novo ante o filial do Lugo, o Outeiro de Rei, Santirso e CD Castro. Adianto dun curso duro onde o obxectivo será, de novo, rematar nos postos de promoción de ascenso. 

Á casa de Make.
O sábado, A Magdalena abrirá de novo as súas portas para o 'Trofeo President'. O partido dará comezo ás 18 horas e será unha das probas máis importantes a pouco de dar comezo a liga, unha primeira data na que o Compos terá que verse as caras ante o Silva mentres que o Racing Vilalbés fará o propio ante o Bergantiños nas Eiroas. 
Outro dato máis curioso que importante é que o Compos terá como rival a unha peza importante do grupo do curso pasado. Make non puido facerse un oco por segundo ano e volveu á súa casa, ao Racing Vilalbés, no que buscará a promoción de ascenso.
Quen non poida asistir ao encontro poderá, como é habitual, seguilo a través das redes sociais da Curva Branquiazul, Facebook e Twitter.

Gran imaxe

Logo da derrota ante o Noia, o Compos superou un gran triangular, de alto nivel, a Céltiga e Cerceda repetindo o mesmo resultado nas dúas citas e deixando moi boa imaxe tanto no xeral nos 90 minutos, coma no particular algúns xogadores, entre os que cabe destacar a Sobrido na súa estrea coa camisola branquiazul. 


Vitoria importante.
O triangular arrincou co Compos e o Céltiga, equipos da mesma categoría, sobre o terreo de xogo. O conxunto branquiazul foi superior e o dominio sobre o terreo de xogo, ademais dun bo estilo de fútbol, fíxose efectivo grazas ao bo traballo dos dous dianteiros que saltaron no once inicial. 
Mediado o encontro, Sobrido inaugurou a súa conta particular como xogador do Compos cun bo gol e Santi, xa con pouco tempo por diante, sentenciou o encontro co segundo tanto. Resultado cómodo ante o equipo da Illa de Arousa pero con derrota nos penaltis posteriores, realizados para dar a coñecer de xeito máis claro un posible campión en caso de empate no total ao final.

ALIÑACIÓN: Lorenzo; Saro, Uña, Mon, Queiruga, Sergio; Casas, Samu, Tomás; Santi e Sobrido.
CARTÓNS: -.
GOLES: 1-0 27' Sobrido, 2-0 40' Santi.
CAMPO: Campo de Reis.

E a sentenza.
Se ante o Céltiga o equipo amosou un bo nivel, non foi menos ante o Cerceda. O equipo de Segunda B, que caeu ante os arousáns cun gol de Stefan, chegaba a este final coa obriga de superar aos nosos para, polo menos, non rematar na última posición do total. Non obstante, nun partido bonito e con ocasións nas dúas porterías, a vitoria foi de novo para a Esedé. 
Cun once semellante ao do partido ante o Céltiga, pero con diferenza no debuxo táctico, o Compos foi de novo un claro gañador do encontro. Corenta e cinco minutos de bo fútbol por parte das dúas escadras pero cos nosos máis acertados de cara a porta. O Cerceda buscou a portería topándose cun bo Lucas e Róber inaugurou o marcador neste terceiro encontro. Rubén estivo a piques de facer o segundo, petou no pau o seu lanzamento, e Sobrido, logo dunha boa xogada de Alex Ares, pechou a vitoria facendo o seu segundo gol da tarde e deixando grandes sensacións.

ALIÑACIÓN: Lucas; Sergio, Queiruga, Casas, Naveira; Samu, Mon; Ares, Róber, Rubén; e Sobrido.
CARTÓNS: -.
GOLES: 0-1 25' Róber, 0-2 45' Sobrido.
CAMPO: Campo de Reis.

Agora o equipo debe volver ao traballo para preparar xa o encontro da vindeira fin de semana ante o Racing Vilalbés na Magdalena, no 'Trofeo President'.

Volvemos a Pontevea


Por terceiro ano, o Compos volve a Pontevea para xogar o Triangular do Praíña Sc.P.. A oitava edición deste triangular das aforas de Santiago volverá a contar co equipo branquiazul ademais de Cerceda e Céltiga, tres equipos de nivel e que seguro deixarán unha boa tarde de fútbol no Campo de Reis.
O Compos non está a pasar o seu mellor verán. Logo de perder ante Lugo e Depor B, neste caso a penaltis, e gañar ante Negreira e Dubra. A iso hai que engadir a recente derrota do mércores na Copa Deputación ante o Noia que fixo que o equipo perdera a oportunidade de aumentar o plan de traballo durante dúas semanas máis, obrigando á directiva a buscar algunha nova ocasión de prepararse de cara á cita ante o Silva do día 20 que dará comezo á tempada regular.
Pola súa parte, o Cerceda prepara a súa estrea, histórica, na Segunda B logo de ascender nos despachos nun verán algo movido. Un equipo que terá outra cita importante o domingo ante o Paiosaco logo de bater ao Atlético Coruña. Antes, superaron a Somozas e Xallas e perderon ante o Deportivo nun partido onde puxeron contra as cordas ao conxunto coruñés.
O Céltiga buscará mellorar sobre o campo o que reforzou no mercado, con bastante pasado branquiazul. Paco, Ángelo e Jacobo Tato enfrontaranse ante o seu ex equipo logo de gañar a Arousa e Moaña e perder a penaltis ante o Coruxo despois dun empate sen goles nos primeiros noventa minutos.
Esta será a terceira ocasión na que a Esedé xogue nos últimos anos en Pontevea. Nas anteriores citas, os nosos non puideron facerse co primeiro posto ante rivais importantes. Na última, o ano pasado, Dous malos resultados ante Somozas e Coruxo non serviron de moito para o equipo de menor categoría do torneo.
O triangular dará comezo ás 18:30h co Compos-Céltiga, unha hora despois comezará o Céltiga-Cerceda e ás 20:30h volverá o Compos para enfrontarse ao Cerceda. Ás 21:30h será o reparto dos trofeos. As entradas para o triangular no Campo de Reis terán un prezo de 5 euros.

Outro amigable. 
Logo de perder a oportunidade de seguir coa preparación na Copa Deputación, o clube estivo rápido buscando un novo partido co que rematar a preparación de cara ao inicio da tempada. Pois ben, a falta do torneo, o Compos terá o sábado 12 unha cita importante en Vilalba ante o Racing Vilalbés, no Trofeo President tres días antes de xogar o que será o último encontro de pretempada ante o Puebla na Pobra do Caramiñal.

E dúas baixas.
Catro eran os rapaces a proba no primeiro equipo e dous deles remataron a súa carreira na Esedé polo momento. Borja Márquez e Samuel Marque non seguirán no Compos logo de non convencer a Yago Iglesias para dar o salto ao primeiro equipo. Os dous, que xa remataron a súa preparación na base este mesmo ano, buscarán demostrar o seu nivel lonxe da casa e aos que só se lles pode desexar moi boa sorte no seu futuro.